Leitzaldeko Hitza » Areso

Mozorroen festa handia

Leitzaldeko Hitza — Mon, 30 Jan 2012 23:15:29 +0000

Eguraldia nahiko traketsa izan arren, ia herri guztiak parte hartu zuen asteburuan Aresoko Inauterietan. Larunbatean eta igandean ekitaldi jendetsuak egin zituzten. Larunbatean, esaterako, herriko gazteak eskean aritu ziren baserriz baserri. Kuadrila ederra elkartu zen eta alaitasuna eraman zuten herriko txokoetara, ijitoz jantzitako familia handi bat irudikatuz. Ibilbidea oinez egin izan bazuten ere, gehientsuena autoz egin behar izan zuten, euriak ez baitzien beste aukerarik eman.
Mozorrotuen desfilerako eguraldiak emandako aukera baliatu zuten. Gazteak gurdiarekin atera ziren, eta txikienek, gehienak kaldereroz jantzita, dantzatxoa eta guzti egin zuten.
Igandean banabar txapelketa eta bertso bazkaria antolatu zituzten. Lehiaketa Mari Karmen Garmendiak irabazi zuen eta bigarren Ana Mari Mariezkurrena izan zen. Guztira zazpi parte hartzaile aritu ziren. Ondorengo ekitaldian, ondo bazkaltzeaz gain, Beñat Gaztelumendiren eta Julio Sotoren saio «bikaina» entzun ahal izan zuten 60 bazkaldar inguruk, antolatzaileek esan dutenez.
Inauterien inguruko balantze ona egin dute aresoarrek. Herri txikia bada ere, giro handia jarri zuten herrikoek.

Mikel Olazabalek eta Larrinagak 22-7 irabazi dute Beotibarren

Tolosaldeko eta Leitzaldeko Hitza — Mon, 30 Jan 2012 16:03:52 +0000

Olazabal-Larrinaga bikoteak erraz irabazi du Bigarren mailako binakako txapelketako partida, Gorka-Arrutiren aurka. Tolosako Beotibar pilotalekuan jokatu da lehia, eta gorriek 22-7ko emaitza lortu dute.

Ijitoek Aresoko kaleak alaitu dituzte

Leitzaldeko Hitza — Sat, 28 Jan 2012 19:06:54 +0000

Aresoko Inauterietan mozorrotuen desfilea egin dute herriko kaleetatik. Ijitoz jantzi dira aurten, bai gazteak eta baita guraso eta haurrak ere, azken hauek kaldereroz apaindu direlarik. Euriak tarte bat utzi duenean, herrian gora abiatu dira, bertako etxeak alaituz. Haurrek dantzatxo bat ere egin dute.

Inauterien hurrengo geltokia, Areso

Leitzaldeko Hitza — Thu, 26 Jan 2012 23:01:04 +0000

Leitzarrak izan dira inauteriez gozatzen lehenak, baina hurrengoek ez dute gehiegi itxaron beharrik, gaur arratsaldean hasiko baitira Aresoko inauteriak. Hiru egunez mozorro eta karrozen koloreek, musikak, dantzak, algarak eta zoramenak hartuko dute herria.
San Pedro jaietan bezala, orain arte herriko gazteak elkartzen diren Lagun Artea elkarteak antolatu izan ditu inauteriak. Aurten, ordea, guraso elkarteak eta udalak ere parte hartu du antolakuntzan. Lagun Artea elkartetik azaldu dutenez, «herritar guztiei zuzendutako jaiak» egitea nahi izan dute, «ahalik eta jende gehien animatzeko festan parte hartzera». Era berean, pasa den urteko jaiek izandako «arrakasta» ikusita, herritar guztiei eskerrak eman dizkiete antolatzaileek, «azken urteetako inauteri onenak izan baitziren». Iazkoei eusten saiatzea da euren helburua, «guztien gustukoa den festaren parte herri osoa izanik».
Bestalde, ekitaldiak herriko leku bakarrera mugatu ordez, aurtegoan Aresoko elkargune ezberdinak erabiliko dituztela ere nabarmendu nahi izan dute. «Gure helburua herritarrak herrian ditugun baliabide guztietara mugitzea da», esan dute. «Iazko inauterietan, esaterako, igandeko bazkaria goiko elkartean egitea erabaki genuen eta oso polita izan zen, bi elkarteetako jendea elkartu baitzen; beraz, aurtengoan ere hori errepikatu nahi izan dugu». Mus txapelketa ere, herriko tabernan egingo dute berrikuntza bezala.
Bi otordu eta lehiaketa
Edozein ospakizunetan bezala, otorduek ere bere lekua dute inauterietan. Bi izango dira, bata larunbateko afaria, eta bestea igandeko bazkaria. Aurtengo beste berritasuna bi otorduetarako bonua erosteko aukeran egon da. «Herritarrak bietara animatu aldera» prezio bajuagoan jarri dituzte bietan izan nahi duenarentzat. Bonuak aurrez erosteko aukera baino ez da egon, baina txartelak egunean bertan ere erosi ahalko dira.
Igandeko bazkarian banabarrak jateko aukera izanen da. Izan ere, banabarren lehiaketa egingo dute. Parte hartzaile bakoitzak bere etxean prestatuko ditu, aurrez Lagun Arteak elkarteak banatu dituen banabarrak.
Herritar guztiak
mozorrotzeko gonbita
Inauterien ardatza mozorroak eta karroza izan ohi dira. Pasa den urteko jaietan «oso karroza politak» izan zirela azaldu dute antolatzaileek. «Hiru karroza irten ziren, oso politak eta landuak, eta jende ugari mozorrotu zen. Aurten ere, herritar guztiak animatzen ditugu mozorrotuta irterera, eta familian edo lagun artean karrozekin ateratzera, ongi pasatzeko ez baita askorik behar».

Hainbat lehiaketa antolatu dituzte gaztetxoentzat

Leitzaldeko Hitza — Thu, 12 Jan 2012 23:01:53 +0000

Aresoko eta Leitzako gaztetxoek Nafarroako Gobernuak aurkeztu dituen hainbat lehiaketetara aurkezteko aukera dute. Hain zuzen ere, literatura, etnografia, deklamazioa, irrati-gidoia eta podcast lehiaketa dira Hezkuntza sailak martxan jarri dituenak. Martxoaren 30era bitarte dute animatzen direnek izena emateko aukera.
Lehen Hezkuntzako hirugarren zikloko eta Bigarren Hezkuntzako ikasleei zuzendutako ekimena da, eta «ikasleen artean sormena bultzatzea eta, batez ere, euskaraz idazteko zaletasuna piztea» du helburu. 6.700 euro banatuko dira sari guztien artean. Sarituek erosketa txartelak jasoko dituzte sariaren balioarekin, eta horiek hainbat dendatan erabili ahal izango dituzte.
Narratiba eta poesia lehiaketa, Jose Mari Satrustegi etnografia lehiaketa, bertso idatzien lehiaketa, irrati gidoien lehiaketa eta euskarazko bideo grabaketa lehiaketa dira gaztetxoek aukeran dituztenak. Lehiaketa bakoitza maila ezberdinetan banatuta dago adinaren arabera, eta gaia eta lanaren neurria ere zehaztuta daude.
Aukera polita dute, bada, ikasleek buruari eraginez lan polit baten bidez saritxo bat eskuratzeko.

802.500 euroko aurrekontua onartu du udalak 2012. urterako

Leitzaldeko Hitza — Tue, 10 Jan 2012 23:01:58 +0000

Aresoko udalak 802.500 euroko aurrekontua onartu du 2012 urterako, inbertsioei bideratzen den atala nabarmentzen delarik. Era berean, urte berriarekin batera, eta «egoera ekonomikoak hala behartuta», hainbat tasa eta zerga igo beharra izan ditu udalak, «ohiko sarrera eta gastuen arteko aldea murrizteko helburuz». Bestalde, 24 etxebizitza eraikitzeko hitzarmena adostu du, eta aurreikuspenen arabera, iraila edo urrirako hasiko lirateke obrak. Hauek eta herriarengan eta herritarrengan eragina duten beste hainbat gai aurkeztu berri dizkie Udalak aresoarrei.
802.500 euroko aurrekontua aho batez onartu zuen udalbatzak azken ohiko bilkuran. Inbertsioetara bideratutako kopurua azpimarra daiteke, pasa den urtekoa gainditzen baitu. «2011. urtean ere inbertsioetara asko bideratu zen, kaleak berritu dira, araztegiak egiten ari dira… Baina, 2012an, are eta gehiago egingo dugu», azaldu du Ur Algero alkateak. Elutseder industrialdean 350.000 euroko aurrekontua duten hobekuntza lanak egingo dituzte, eta hori izan da 2012rako aurrekontua igo izanaren arrazoia. «Bertan dauden enpresariei zuzenean eragingo die lan hauek, beraz, beraiek ekarpena egingo dute obra finantzatzeko», dio Aresoko alkateak.
Bada, hori litzateke inbertsioetan handiena. Beste inbertsioen artean leudeke, hainbat baserrietarako bideak konpontzea, Anosenea azpiko pareta egokitzea eta udaletxeko lehen solairuko beste gelak egokitzea, esaterako.
Diru sarrerak behera
Bestalde, gastu orokorra jeitsi egin da, «garrantzitsuak edo beharrezkoak ez ziren gastuak kenduz, baina, beti ere, zerbitzuei eta herritarrei eragiten ziena mantenduz». Izan ere, diru sarrerek behera egin dute nabarmen, «hein handi batean uso postuen enkantean azken urteetan beherakada handia eman delako, eta basoetako egurra erdira jeitsi delako», azaldu du Algerok.
Bada, «gastuen eta diru sarreren arteko aldea murrizteko ahalegin horretan», udalak hainbat tasa eta zerga igo ditu. Hala, hiri eta landa lurrengatik kontribuzioak %10eko igoera izango du; saneamendua 35 eurotik 45era igoko da, eta ur hornidura 40 eurotik 45era. Azkenik, wi-fi zerbitzuaren tasari KPIa batuko zaio. «Orain arte, udalak jasotzen zuena baino gehiago ordaintzen zuen zerbitzu horiengatik, eta igoera horiekin, batetik, orekatzeaz gain, herritarrak sentsibilizatu nahi ditugu, benetan jakin dezaten zerbitzu horien gastua zenbatekoa den; dena den, igoerak igoera, eskualdeko beste herrien presio fiskalaren azpitik dago oraindik ere Aresoko zerga presioa».
Diru laguntzak behera
Bestalde, diru sarrerak gutxitu izanak zerikusia du Nafarroako Gobernutik datozen diru laguntzak murriztearekin. Hala, esaterako, 2012an ez da abeltzaintza inbertsioetarako dirulaguntzarik izango. Kirol mankomunitateari 2011rako hitzartutako dirulaguntza ez emateaz gain (30.000 euro) 2012an ere %50 inguru jaitsiko dute laguntza. Euskara mankomunitatearen kasuan, dirulaguntzak ia desagertu egingo dira, eta euskarazko komunikabideei ere ez zaie dirulaguntzarik emango. «Ondorioz, udalen esku geratzen da, zerbitzu horiek mantentzen jarraitzeko gastuari aurre egitea».
Era berean, uholdeek eragindako kalteengatik ez da Nafarroako Gobernutik aurreikusitako edo esperotako diru laguntza guztia jasoko, «horri aurre egiteko baliabiderik ez dagoelako». Ondorioz, litekeena da udalak hainbat gasturi bere kabuz aurre egin behar izatea.
24 etxebizitza berri
Datozen 4-5 urteetan 24 etxebizitza eraikiko dituzte Areson. Zortzi etxebizitzadun hiru eraikin izango dira orotara, eta herriaren sarreran, Patxikune etxearen parean dagoen lursailean altxako dituzte. Etxebizitza hauek eskuratzeko orduan, lehentasuna izango dute aresoarrek. Hauentzat 150.000 euro ingurukoa izango da bizitza bakoitzaren balioa. Enpresa sustatzailearekin behin behineko hitzarmena adostu du Udalak. Horren arabera, 90 m2 inguruko zortzi etxebizitzadun hiru eraikin egingo dituzte. Aurreikusitako epeak betetzen badira, iraila amaieran edo urri hasieran hasiko dira eraikitze lanak.

Langabetuei zuzendutako sukaldaritza ikastaroa

Leitzaldeko Hitza — Tue, 10 Jan 2012 23:01:08 +0000

Cederna-Garalurren bidez langabetuentzako sukaldaritza ikastaro bat antolatu asmo dute. Sei hilabeteko iraupena izango du, eta parte hartzaileek gutxieneko lanbide arteko soldata jasoko dute. Izena eman ahal izateko ezinbestekoa da aurretik Nafarraoko enplegu zerbitzuan langabetu bezala azaltzea. Ikastaroa herritarren eskariaren arabera gauzatuko da, eta aurreikuspenen arabera, maiatza bukaera edo ekaina hasierarako martxan egongo da.

24 etxebizitza eraikiko dituzte Areson

Leitzaldeko Hitza — Thu, 22 Dec 2011 12:05:04 +0000

Datozen 4-5 urteetan 24 etxebizitza eraikiko dituzte Areson. Zortzi etxebizitzadun hiru eraikin izango dira orotara, eta herriaren sarreran, Patxikune etxearen parean dagoen lursailean altxako dituzte. Etxebizitza hauek eskuratzeko orduan, lehentasuna izango dute aresoarrek. Hauentzat 150.000 euro ingurukoa izango da bizitza bakoitzaren balioa.
Enpresa sustatzailearekin behin behineko hitzarmena adostu du Udalak. Horren arabera, zortzi etxebizitzadun hiru eraikin egingo dituzte, eta eraikin bakoitzak bi solairu izango ditu. Solairu bakoitzak 90 m2 inguruko lau etxebizitza hartuko ditu.
Lehentasunak eta prezioak
Aresoarrek etxebizitza hauek eskuratzeko lehentasuna izango dute. Honen barruan sartuko lirateke Areson azken bi urteetan erroldatuta dauden herritarrak, gutxienez lau urtez erroldatuta egon direnak, edota lehen graduko senitartekoren bat aresoarra dutenak. Hauek, gainera, prezio baxuagoan erosi ahalko dute etxebizitza, 150.553 euroan (BEZa kontuan hartu gabe), hain zuzen. Ezaugarri horiek betetzen ez dituztenek 10.000 euro inguru gehiago ordaindu beharko dute, 160.568 euro.
Bestalde, eraikin bakoitzak dituen zortzi bizitzetatik batek azalera txikiagoa duenez, honek salneurri baxuagoa izango du, 4.000 euro inguru gutxiago, 146.553 euro, alegia. Prezio hauen barnean, garajea eta trastelekua sartzen dira.
Irailerako obrak martxan
Hitzarmenaren barruan bi familientzako etxe bat eraikitzea ere aurreikusten da. 24 etxebizitzen kasuan, behin betiko onarpena ematen zaion unetik lau urteko epean eraikiko direla jasotzen du hitzarmenak, eta bi familientzako etxea, berriz, zortzi urteren buruan.
Behin behineko hitzarmena onartu du udalak, eta orain 20 eguneko epea dago, hau da, urtarrilaren 12ra artekoa, hitzarmenari alegazioak aurkezteko. Epe hori igarota, behin betiko hitzarmena sinatuko litzateke, eta Nafarroako Gobernuaren onespena beharko luke. Tramitazio horiek guztiak igarota, irailerako espero dute obrei ekitea.
Lursaila urbanizatzea eta etxebizitzen eraikitzea epe berean egingo dira. Hiru eraikuntzak, ordea, ez dira batera egingo. Lehendabiziko eraikinarekin hasiko dira, eta hori bukatu ostean, bigarrenarekin hasi aurretik eskariari begiratuko zaio, hau da, etxebizitza horiek betetzeko zerrenda dagoen ala ez ikusiko dute. Dena den, lau urteko epean etxebizitza guztiak eraikita egongo dira.
Aurreko legegintzalditik zetorren gaia dela azaldu du Ur Alguero Aresoko alkateak. «Azterketa moduko bat egin zuten herritarren artean, eta atera zen ondorio argietako bat zen nahiz eta etxebizitza oso handia ez izan prezio aldetik erosteko moduko etxebizitza nahi zutela herritarrek». Gobernu berriak ere negoziatzen jarraitu du, «ahalik eta prezio duinenean eta kalitatea bermatuz eraikitzeko etxebizitzak».
Bai hitzarmenaren berri emateko, bai eta 2012. urteko aurrekontuak azaltzeko herri batzarra izango da datorren ostiralean, hilaren 30ean, 20:00etan udaletxean.

‘Panpanoziri’ aldizkaria kalean da

Leitzaldeko Hitza — Tue, 20 Dec 2011 17:50:11 +0000

Iragan abenduaren 3an ikusi zuen argia Aresoko aldizkari berriak. Panpanozirik bi urtean behin Aresoko berri emango du, bertako historia, bitxikeriak, pasadizoak, datu interesgarriak edota argazkiak erakutsiz.
Arano, Areso, Goizueta eta Leitzako Euskara Zerbitzuaren ekimenez jaio da argitalpen berria. David Anaut Euskara Zerbitzuko arduradunak azaltzen duenez, «Aranok, Goizuetak eta Leitzak badute euren aldizkaria, eta Areson hutsune hori zegoenez, berri bat sortzea proposatu genuen». Bada, hurrengo pausoa aldizkariari izena ematea izan zen, eta hori herritar guztiei parte hartzeko deia luzatuta egin zuten: «36 hitz jaso genituen, eta Panpanoziri aukeratu genuen, izen hori oso herrikoa baita».
5-6 lagunez osaturiko lantaldeak egin du aldizkariaren lehen alea. «Lantaldea irekia da, hau da, nahi duen herritar orok har dezake parte; Aresoren inguruko gaiekin zerrenda osatu genuen, hortik aukeraketa egin, eta ondoren banatu», azaltzen du Anautek.
2013an bigarren alea
Bi urteren buruan bigarren alea jaioko da, eta orduan ere herritarrek euren etxeetan izango dute 28 orrialdez osaturiko herriaren berri ematen duen argitalpena.

Etxarri Plazaola partzuergoko lehendakari berria

Leitzaldeko Hitza — Wed, 07 Dec 2011 18:04:33 +0000

Aitor Etxarri Leitzako udaletxeko zinegotzia, izendatu dute Plazaola partzuergo turistikoko presidente berri. Iragan azaroaren 28an eginiko batzarrean egin zen hautaketa.
Lekunberriko antzinako Geltokian egin zuten Plazaola partzuergo turistikoko batzar orokorra, eta bertan landu ziren puntuetako bat partzuergo turistikoaren lehendakari berriaren hautaketarena zen. Bada, kargua hautagai bakarrari egokitu zitzaion, Leitzako alkateordea den Aitor Etxarriri, alegia. Aipatzekoa da kargu hau tokiko erakundeetako ordezkariek soilik bete dezaketela.
Plazaolako kide diren udaletxeetako ordezkari gehienak izan ziren batzarrean, Leitza, Larraun, Lekunberri eta Aresokoak, hain zuzen. 2012an Plazaolako kide berria izango den Imotzeko udaletxeko ordezkariek ere parte hartu zuen, eta baita ostalaritza, landa etxe, artisau eta askotariko zerbitzuen elkarte profesionaletako ordezkariek ere.
Batzar horretan beste hainbat gai landu ziren. Azken akta onartu zen, 2010eko Kudeaketa Txostena eta Kontuen Itxiera onetsi ziren; 2011ko aurrekontua eta 2012ko kuotak ere ontzat eman ziren, Imotzeko udaletxea kide berritzat onartu zen eta Partzuergoko eta orokorrean zonaldeko promozio tresna izango den ikus-entzunezko berria aurkeztu zen.